الرئيسية / بيت الأدباء والشعراء / ( ميراثنا دعوه في النفوس )بقلم / معوض حلمي

( ميراثنا دعوه في النفوس )بقلم / معوض حلمي

اليوم الجمعة
٧ / ٤ / ٢٠١٧
عيد ميلاد حفيدي شادي
___________________
( ميراثنا دعوه في النفوس )
النهارده عيد ميلادي
لما قالوا هل شادي
قلت شاف النور حفيدي
واتولد نبضه ف وريدي
ساعتها زرع الخير طرح
وحس قلبي بالفرح
لما بعتولي البشاره
فرحه نستني الفراق
والفراق في الغربه داء
بس كان عندي رجاء
كان نفسي اشوفك
وانت نازل للوجود
كان نفسي اشيلك
وارسم على جبينك ورود
كان نفسي أفرح
فرحه وتعدي الحدود
فرحه ليها القلب دق
دق ليها ياواد ورق
رغم اني هاكبر وابقى جد
بس أقولك
أغلى فرحه ياواد بجد
إني ابقى جد
وانت امتدادي
واسهر أنادي ربنا
يحميك ياشادي
تكبر ياواد تصبح وتد
زي ابوك ضهر وسند
وان مره ضعت من العدد
خليك مدد
وإياك تقول
في الشده مالي
وانت الأصيل من جدر غالي
وإياك تميل ميل العويل
سماك ابوك
على إسم صاحبه
أصل الوفا دايما مصاحبه
وانا قبل أبوك
صاحبت ابويا
وابويا قبلي كان وفي
لابوه وقلبه كان عفي
شال جدوده جوا عينه
وانا نبع يابني من معينه
ميراثنا يابني مش فلوس
ميراثنا دعوه في النفوس
إسمعها مني عشان سلامتك
لما ستي يوم قالتلي
ست ابوك
قالت له روح
( يجعل عمارة الدار سلالتك)
وانت باقي من معيني
وانا شيلت ستي
جوا عيني
دعوتها ليا جت لعندك
ومعاها دعوة ست ابوك
سعدين وإيجوا
يزيدوا سعدك
وان لقيت الحظ عاندك
إياك تتوه في بحور ظنونك
بس افتكر دعوة جدودك
وخلي ستك جوا عينك
إرويها يابني من معينك
وافتح طريق للدعوه تمشي
توصل ياشادي لولد ولدك
دستورنا يابني مش فلوس
دستورنا دعوه في النفوس
باقيه حيه في قلب جدك
طارحه خيرها عشان سلامتك
والدعوه واصله لحد عندك
إحفظها دستورك ياشادي
الدعوه ليك والسعد سعدك
يجعل عمارة الدار سلالتك
( يجعل عمارة الدار سلالتك )
________________
بقلمي ………
معوض حلمي
منشأة بطاش
تمي الأمديد
دقهلية

عن Amr Hero

شاعر مصري معاصر

اضف رد

لن يتم نشر البريد الإلكتروني .

x

‎قد يُعجبك أيضاً

نَجْمَتِي الشاعر والروائي/ محسن عبد المعطي محمد عبد ربه..شاعر العالم

نَجْمَتِي الشاعر والروائي/ محسن عبد المعطي محمد عبد ربه..شاعر العالم حَبِيبَتِي يَا ...