بيت الأدباء والشعراء

يا ضمير العالم

يا ضمير العالم

حمامه لون النهار

مصلوبه على برج الموت

وصرخة ألم مخنوقه

راح منها الصوت

ودموع ف عيون حيرانه

مش عارفه تفوت

وعيون ف دموع غرقانه

مراكبها سكوت

وتابوت شايلك يا ضنايا

وأنا قلبي وياك محطوط

خطفوك من عمري

وفاتولى الحزن المكبوت

يا ضمير العالم

فين ابنى

فين شجر التوت

فين ضحكة شمسى فوق بيتى

وكتاب مخطوط

مين خطف الغنوه من طيري

والورده من قلب العود

منحوت على صدرى أوجاعى

والجرح بيمد خطوط

ملعونه يا إيدين بيتطبطب

وبتغزل م الدم خيوط

وبتسرق من داري الضله

وبتخطف من بطنى القوت

أنا خايف من بكره يجيلي

يناديلى من بطن الحوت

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق
%d مدونون معجبون بهذه: