بيت الأدباء والشعراء

الطير الحزين

..الطــير حــزين ..
————د خيري السلكاوي
..
لو كان صحيح الحل
هو الانسحاب
يبقى خلاص نقفل بقى
فى القرب بينا الف باب
واي قاموس في الهوى
يحذف بقى كلمة عذاب
علشان عناد قلبين
اوام راحنفترق!!
و الشوق نسيبه
جوا منا ينحرق
و الهجر يقتل عشقنا..
و العمر وياه ينسرق !!
..
من امتى كان ممكن
اتوه على سكتك
او يوم تنامي
وانت شاربة قهوتك
من غير م صورتي
تبان عليها برنتك
انا راضي تحكم زمتك
ياما انخدعت ببسمتك
وشربت مر العشق
من كاس حضرتك
ولا عمرى قلت الكاس دا مر
كان جوا قلبي شايله سر
بشرب واقول كله يمر
..
ياحبيبتي لازم تعرفي
لو يوم غريق صوت
وقال للناس يا هوووو
راحينقذوه
ولا انت شايفة الناس
هاتهرب ويسبوه
واحنا اللى كان
قدام عنينا حبنا
عمال بيغرق واحنا سايبينه
بناقش ازاي نفترق
والحب منا بينسرق
بالعند ناسيينه
..
وهمنا مين مننا
مهزوم ومين اللي انتصر
مين اللى فينا قلبه
في لحظة انكسر
وانا قلبي مهما ينعصر
لا حب مابينا انكسر
ولا يوم سمعتي انتي
ولا يوم لقيتيني مغير سكتي
ولا عمري كلمتك مبدل لكنتي
مع اني بتكلم لغات
..
انا يا حبيبتي لسة فاكر
عمري مانسيت اللي فات
والحب ساكن
جوا قلبي بنبضته
ساكت وعارف سكته
عمره مامات
اوقات كتيرة الحل
بيكون السكات
و انا قلت اسكت
يمكن المركب تسير
مادام حبيبتي بين اديا
آنا ليها وهيا ليا
عصفورة بتزقزق كتير
اطير تطير
اميل تميل
اجمل اميرة حب
فى قلب الامير
وساعات تغير
في الغيرة كان مالهاش مثيل
وانا كنت صابر
..
جاية النهاردة
بعد مافات الاوان
واتفتحت كل البيبان
والحق بان
إن العناد هو السبب
بتقولي لازم نفترق
لو يوم نسيتي كلمة حلوة
جمعت بينا زمان
ان الاوان
نقولها تاني لبعضنا
ونرجع الحب
اللي كان بيضمنا
ياما انتظرنا
البحر ينقذ حبنا
لا البحر قرب مننا
ولا مد حبل يشدنا
والموج كمان
لقيته غرق شطنا
وانت هناك وانا هنا
..
طب ليه كدة
واحنا اللي كان
كل اللي حبوا
غيرانين من حبنا
والشمس كانت
كل يوم بدري
تزورنا ف عشنا
والطير يزقزق
كل يوم فرحان بنا
مش معنى ان الطير
ماغناش النهاردة
والشمس غابت عننا
انه مش هايغني تاني
الحب بين اتنين مايمشيش
بالدقايق والثواني
الطير مابيغنيش كلام
مالهوش معاني
والطير بيهرب م الفراق
ياريت يكون القلب فاق
و انملا بالحب تاني
من غير عتاب
او انسحاب
..
ساعتها هانلاقي لرجوعنا
ميت سبب
والطير اكيد يرجعلنا
ويغني تاني لحننا
والشمس تاني كل يوم
نلاقيها داخلة عشنا
والصبح ف اديها
يفتح وردنا
ويقول لنا
اجمل كلام فى الحب
يروي قلبنا
من غير غضب
..
——————-
**********************

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق
%d مدونون معجبون بهذه: