بيت الأدباء والشعراء

عجيب يا زمن وائل سعيد

(عجيب يا زمن ))

عجيب يا زمن ويا زمن العجايب

الغربة فيك وطن والوطن فيك غايب

فيك سواد البشر يتقهر ويتعايب

والقسوة زى المطر تخلى الشباب شايب

وكل القلوب تتكسر ولورا الجميع جايب

….

العدل غاب واتستر وحضرت لينا مصايب

ويموت بضرب الحجر اللى مالوش نايب

وتفوز لئام البشر بقوت فقيردايب

…….

فيك الغريب أمر والقريب حاير

يطوف ببان البشر وبضعفه يتعاير

أه يا زمن الشرر رحى الشيطان داير

……..

ومن عجايبك يا زمن غدر الحبيب وارد

لا يهمه حب وشجن ويهجر ويتبارد

متع الحياه دى وثن يعبدها ويتمارد

لا يهمه أنة ألم فى وسط ليل شارد

واللى معاه الثمن دوام الوصال وارد

………..

وفى وسط هذا الزخم وتوهنا فيك دايم

نلاقى كف اترفع يدعي لنا بنسايم

رغم البعاد والألم وعقوقنا وجرايم

الأم تدعى بنعم وصلاح لحال دايم

……

زهقنا منك يازمن إمتى نتفارق

كل اللى فيك حمم فى الغرب ومشارق

كتاب بنود القيم فى دم البشر غارق

والاسم عصبة أمم بالفيتو تتنافق

ولما يزيد العتم على الشجب نتسابق

وكل ما يطلع سنم للسلم نتفاثق

ينزل علينا الغضب مع بعض نتخانق

قتل البشر مش قدر دى محن ومفارق

إما طريق المرر وصراع مالوش سابق

وإما طريق الخضر وطاعة للخالق

……….

عجيب قوى يا زمن الكل فيك نافق

من يوم ميلاد البشر لليوم مفيش فايق

والكل مات واندثر والعبد والعايق

ورغم هذا يازمن برضه المزاج رايق

……..

ونعيب فى غدرك زمن والعيب فينا شاهق

ومن يعيب ع الزمن كان بس متضايق

وكل حرف انكتب كان فى الألم غارق

وقدرنا ماضى انكتب وأمر الحسيب سابق

……..وائل سعيد …..

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق
%d مدونون معجبون بهذه: