بيت الأدباء والشعراء

وحيد ع شط غريب معرفش

وحيد
ع شط غريب معرفش
حتي بادء منين
ولا جاي مع مين
البحر بيتحرك
ومالوش صوت
متكتف لحد بر معين
كأنه لي حدود
والناس مش هي الناس
كأني اتولد ف عالم جديد
او لسه بتعرف ع الوشوش
او غبار الجو عماني
وشايف طشاش
هي الناس دي عرفاني
ولا انا اللي معرفهاش
انا اخر حاجه كانت ف بالي
اني كنت بحكي ع الورق قصتي
وسرقني الخيال لبعيد
واسترجعت رحلتي
واني مش حابب اعيش
بجناح مكسور
واني اجاري الريح
وعلي عيشتي
اكون مجبور
محبتش اطير وانا مش عارف
رايح فين
اضليت ف طريقي
وتاهت العنواين
ياحبيبتي ملعون العيشه
لو هنعشها بدماغ غَيرنا
كان نفسي النصيب والقدر
يختاروا اتنين غِيرنا
ونكتب اشعار واغاني
بتغني مزيكه ايامنا
ونسيب العالم ده بحالو
ونسكن احنا ف عالمنا
كان نفسي الليل يكون لينا جميل
ونسهر معاه ع النيل
ومايكونش قاسي
ومليان ذكرايات
ينسانا اليوم بحالو
ويفتكرنا اخر سعات
سأل النيل الليل علينا
وكان كل ليله
يستنوا خطوطنا
ليه غيرنا مسار خططنا
ويتقابلوا النيل والليل
بس ف مكانين
محبتش اطير
وانا مش عارف رايح فين
المطره اللي بتنزل تمسح
الشارع وتفتح بساتين من الورد
بقيت بتنزل كلونيا ع جرحي
حميتك من عيون الكل
وانتي راهنتي الكل ع دبحي
اصبحتي خصمي ف الحرب
وجيشي كان ذكرياتك المؤلمه
داويت كتير ف جروح منك
بس لسه معلمه
هخسرلك الحرب ياحبيبتي
وارجع اقول انا المنصور
راية النصر من نصيبك
كسرتي قلب عاش حبيبك
وحقه مارجعلهوش
ورجعت ادور بين الناس
وبين الوشوش
واكتب ع الورق واسكت
ويكمل قلمي كتابه
محبش القلم يسكت
ويصدق حرب كدابه
ورجعت بالعين اللي بتبص طشاش
هي الناس دي عرفاني
ولا انا اللي معرفهاش

بقلم / كريم محمد عبد النبي

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق
%d مدونون معجبون بهذه: